Banner
Logg inn
Kven er pålogga
Vi har 19 gjestar her no

Volda tennislag

Delvis opning av tennishallen!

 

Styret har valgt å opne tennishallen delvis for spel etter at FHI og NIF kom med retningslinjer. Reglar i smittevernlova SKAL fylgjast, samt set deg inn i koronavettreglane før spel i hallen.

Les skriva nedanfor NØYE, og følg reglane! Vert der oppdaga mislighald og regelbrudd må me diverre sjå oss nøydde til å stengje hallen for bruk igjen. Dersom alle tek ansvar for dette vert hallen ei kjærkomen avkopling for mange i denne tida.

Vamos!

 

VIKTIG INFO Covid-19

Oppdatert 03.04.2020

Idrettsforbundet har i samråd med Folkehelseinsitituttet kome med retningslinjer for idretten. Hovudregelen er at ein må følge smittevernlova:

· 2 m avstand

· Max 5 personar

· Ikkje bruke samme utstyr

Sidan det er utfordrende å ikkje bruke samme utstyr (ballar) i tennis kan ikkje Tennisforbundet på generelt grunnlag anbefale tennisspel.

Det er derimot ikkje spesielt lagt ned forbod mot tennis så lenge ein klarer å følge smittevernlova.

Etter nøye vurdering har Volda Tennislag med bakgrunn i dette valgt å DELEVIS opne opp for spel i tennishallen. Personar i risikogruppene for Covid-19 bes vurdere nøye om ein bør spele tennis i perioden framover. Følgende reglar SKAL følgast til punkt og prikke:


Koronavettreglar

Medlemmer i samme husstand:

1. Tørk av dørhandtak inn til hall og garderobe ved avreise

2. Bruk antibac eller såpe/og vatn grundig før ved ankomst OG avreise

3. Opphold dykk minimalt i hallen og følge rutiner for god handhygiene

4. Om du har symptom som kan minne om Covid-19 har du ikkje lov til å nytte hallen

5. Ta med ALT EIGE UTSTYR heim etter økta er ferdig.

Medlemmar som ikkje er i same husstand

1. Alle reglar nevnt over for samme husstand gjeld

2. MAX 2 personar i hallen samtidig.

3. Kun ein partner i perioden framover

4. Kvar spelar skal ha eigne ballar

a. Ballane må merkast/evt. forskjellig type.

b. Motstander skal ikkje berøre partner sine ballar

c. Ved serving skal KUN eigne ballar nyttast

Reglane  følgast. Om vi ikkje klarer dette må vi stenge hallen for all aktivitet. Dei gjeld inntil anna er informert. Her må alle ta ansvar!

 

 

Voldameisterskapet innandørs i tennis 2020

 

 

Helga 15-16 februar vart det avhalde Voldameisterskap i tennis innandørs i hallen på Bratteberg. Denne gong måtte diverre balltalentet og mangeårig meister Kai Are Strande melde forfall grunna sjukdom. Dette gav dei andre Voldaspelarane blod på tann, og mange låg i hardtrening og køyrde opp i mot to økter pr. veke forut meisterskapet. Rykta om forfallet til Strande hadde nådd heilt til Ålesund og eit par timar før påmeldingsfristen gjekk ut, hadde ikkje mor Maria Hellevik noko anna val enn å melde på eldstesonen Sigmund på 16 år, då ho skjøna at gutungen hadde gode moglegheiter på eit trofe, då hans tidlegare nemesis Strande, ikkje kunne stille dette året.

 

Totalt 14 spelarar stilte til start, inkludert ei kvinne. Mangeårig deltakar Ermelita Folkestad gjorde ein god figur både på bana, der ho til tider var tennisteknisk på Strande-nivå, samstundes som ho briljerte med meir smaksrike sveler enn noko Sunnmørsferge har å by på. 

 

Etter gruppespelet var det klart for kvartfinalar og 8 namn stod igjen. Fjorårets tapande finalist i VM utandørs, grusspesialist Ole Wirum møtte ringreven Hans Reite. Reite håpte nok på hjelp frå oven, men truleg er ikkje tennis Jesus sin favorittsport, for forehandslegga til Wirum viste ingen nåde og sendte Reite ut på dei evige jaktmarker med settsifra 6-2.

 

I den andre kvartfinalen møttest gladlaksen Arne Inge Rotevatn og mannen med kanskje det største vinnarinstinktet i Volda tennislag, Hallgrim Myklebust. Matchen bølgja att og fram og tilslutt var det Rotevatn som klarte å karre til seg sigeren, trass i at motstander Myklebust brukte all si mentale kraft på å hindre Rotevatn å yte maksimalt. 7-5 Rotevatn.

 

Etter dette intense oppgjøret var det duka for trebarnsfar Vebjørn Skeide mot ekstremdiettmannen, Kristian Nybakk. Dei fleste hadde her Nybakk som favoritt men sidan dietten han praktiserer ikkje gav han adgang til kakebordet i foajeen, var mange i tvil om han hadde nok sukker i blodet til å nedkjempe den fysisk overlegne Skeide. Skeide har teke store steg det siste halve året, takka vere han endeleg har skjøna korleis ein held i ein tennisracket. Vinnerinstinktet til Skeide er og uovertruffent, og ikkje alle glosene som vart presentert hadde gått igjennom sensuren til tidlegare nemnte Reite. Dog hadde Nybakk sin biff-frukost fungert som ein depottablett denne dagen, og han klarte dermed å halde energinivået høgt nok oppe til å kneble Skeide med 6-4.

 

I den siste kvartfinalen hadde årets nykommar i Voldatennisen, Jørn Festøy booka sin plass. Dette mykje grunna ein serve som får John Isner til å skjelve i buksene, samt ein tung og god forehand med spin i Nadal-klassen. Motstander var her unge Sigmund Hellevik Bergstøl frå Ålesund. Av mor Maria Hellevik klassifisert som Noregs beste servar i sin årsklasse. Det seier ikkje reint lite, men det seier og noko om at Hellevik ikkje hadde sett serven til volleyball-ess Festøy tidlegare. Servebataljen endte med favorittsiger til ungkalven, men Festøy imponerte til tider stort, og tok med seg tre games. 6-3 Bergstøl. 

 

I fyrste semifinale møttest Wirum og Rotevatn. Eit oppgjer prega av god stemning kampen gjennom, då motstandar Wirum klarte å more seg med alle småkommentarane til Rotevatn, istadenfor å la det verte eit irritasjonsmoment. Wirum hadde fått stilt inn forehanden mot Reite i kampen før, så Rotevatn vart tvunge frå side til side og kunne ikkje unngå settsiffra 2-6. I andre sett merka Wirum stor slitasje på den dårleg trente kroppen, og tjue år eldre men lettbeinte Rotevatn, kunne hauste frukta av å vere i betre fysisk forfatning enn sin motstandar. Merkeleg nok klarte Wirum å mobilisere, og tok matchen 6-2, 6-4.

I den andre semifinalen møttest Bergstøl, stortalentet frå Ålesund og Kristian Nybakk. Bergstøl hadde her tydlegvis stått opp med rett tenåringsbein og unnlot å la dumme tenåringsfakter komme i vegen for sin marsj mot finalen. Toppnivået vart hyppig presentert, og sjølv ikkje Nybakk sin ekstremdiett kunne stoppe godstoget Bergstøl. Det enda med 6-1, 6-2 Bergstøl. 

 

Finalen bar på den eine sida preg av ein tenåring full av ungdommeleg kraft og ein litt eldre motstandar som ikkje hadde funne ungdomskjelda, men derimot store mengder med Voltarol og Tigerbalsam i tennisbagen. Dermed klarte Wirum på mirakulaust vis å fullføre kampen. Første sett var ein parademarsj for Bergstøl, og andre sett var prega av ein tenåring som ikkje tok sin motstandar seriøst. Dermed kunne Wirum tvinge fram ei tidleg 4-2 leiing. Her skjøna Bergstøl faren og skrudde på brytaren. Dermed vart Wirum kokt lenge før han nådde 100 grader, og sigeren var eit faktum. 6-1, 6-4 Bergstøl.

 

Takk til alle som bidrog til tennisfesten denne helga, og me håpar enda fleire ynskjer å delta under Voldameisterskapet utandørs tidleg på hausten. 

 

Ole Wirum, referent.  

 

Årsmøte

Volda Tennislag

Innkalling til Årsmøte.

på Volda Turisthotell, tysdag 10.03.20 kl.19:00.

Det blir servert pizza etter årsmøtet til dei frammøtte.

Sakliste:

1. Godkjenne dei som har stemmerett.

2. Godkjenne innkallinga og saklista.

3. Val av møteleiar, skrivar og to medlemar til å sign. protokollen.

4. Handsame årsmeldinga for 2019.

5. Handsame rekneskapet for 2019.

6. Handsame innkomne forslag/ saker.

7. Fastsette medlemskontingent og treningsleige for 2020.

8. Vedta budsjettet for 2020.

9. Val av nytt styre. 

Forslag på saker til årsmøte må sendast styret på sms eller på e-post seinast  01.03.20.til mobilnr. 47012458 eller Denne e-postadressa er verna mot program som samlar e-postadresser. Du må aktivere JavaScript for å kunne sjå adressa

Volda Tennislag

Vebjørn Krumsvik Skeide (leiar.)

 

Voldameisterkapet i tennis 2019

Det var med ei blanda kjensle VM vart gjennomført på grusbana ved Volda Bygdetun helga 7-8 september i år. Det var kun 6 spelarar som hadde ynskje om å stille denne gongen, som nok er eit absolutt minimum for ei sportsleg forsvarleg gjennomføring. På plussida så hadde vêrgudane og mangeårig meister Kai Are Strande meldt sin ankomst.

Nemnte Strande fossa igjennom si gruppe, og den store spenninga låg i kven som unngjekk å møte meisteren i den eine av søndagens semifinalar. Mangeårig pallgrossist Hallgrim Myklebust møtte oppkomlingen og framtidig Sæbøborgar, Ole Wirum. Wirum hadde fylt opp med fyrstekake og wienerbrød og hadde dermed nok bensin på tanken til å vise toppnivået tidt og ofte. Dermed måtte Myklebust sjå seg slått 6-3/6-2, og måtte ta til takke med den utakknemlege oppgåva å møte Strande til søndagens fyrste semifinale. Den siste semifinalisten vart nyvald leiar av Volda Tennislag, Vebjørn Krumsvik Skeide. Ungfolen Skeide med sin fantastiske fysikk, klarte å nøytralisere dei smarte slaga til ein av Ervingens blandakor sine største ambassadørar, Helge Haram. Dermed booka Skeide sin plass i den andre semifinalen mot Wirum.

 

Søndagen starta med storoppgjer mellom erkefiendane Strande og Myklebust. Strande ekspoderte ut av startblokkene og kunne tidleg sikre seg ei 4-1 leiing, då Myklebust bokstaveleg talt ikkje hadde vakna. Så titta sola fram over Rotsethornet og Myklebust fekk påfyll av sårt tiltrengd D-vitamin. Dermed stod det plutseleg og vippa på 4-4 i games, men deretter viste Strande klasse, var best då det gjaldt og tok settet 6-4. Andre sett steppa Strande opp og gjorde ikkje skam på sitt kallenamn ”luftputebåten”, der han lettbeint fløyt rundt på bana og tvinga Myklebust ut på fleire løpeturar enn han har hatt i heile 2019. 6-0.

 

I den andre semifinalen var Wirum klar førehandsfavoritt, men spenninga låg i om Skeide kunne nøytralisere Nadal-forehanden til Wirum med sitt eminente fotarbeid og sterke keeper-arm. Svaret var nei, og Wirum klarte til slutt å slå hol på Skeide og kampen enda 6-2/6-0.

 

I bronsefinalen hadde førehandsfavoritten Myklebust slått seg varm, og viste ingen nåde. Trass fleire forsøk av Skeide på å få psykolog Myklebust i mental ubalanse, brukte Myklebust si eigekompetanse og slo av nervesystemet. Det enda med 6-2/6-0 i favør Myklebust.

 

Finalen mellom Strande og Wirum starta med eit overtak til Wirum med henholdsvis 3-1 og 4-3. Strande starta så si sedvanlige reise mot toppen og gjorde mindre og mindre feil, samstundes som kroppen til Wirum hadde fått nok. Det fysiske er utruleg viktig i tennis, og Strande viste i finala at han det siste tiåret nok har teke vare på eige kropp i større grad enn motstandaren. Strande tok dei siste 9 games og kampen enda 6-4/6-0.

 

Alt i alt var helga ein stor suksess og grusbana på Haualeitet har nok aldri vore i betre forfatning enn no. Trass i godver og mykje godt å bite i, let dei store tilskodarmassane vente på seg. Rekruttering er vanskeleg, men me håpar at Volda og Ørsta-ungdommen snart får auga opp for denne fantastiske sporten, og kanskje byter ut store ballar med små ballar!

 

Referat, Ole Wirum Volda Tennislag.

 

 

Referat frå årsmøte 27 januar 2019

Referat frå årsmøte 15 februar 2019

 

Stad: Volda turisthotell

 

Tilstades: Oddbjørn Nes, Sverre Johnsen, Helge Haram, Kai Are Strande, Hallgrim Myklebust, Ole Wirum, Hans Reite, Lars E. Sande og Pat Johnsen.

 

Saker som vart handsama:

 

  • Alle dei frammøtte har stemmerett.
  • Innkallinga og sakslista vart godkjend.
  • Oddbjørn Nes vart vald til møteleiar, Ole Wirum vald til skrivar, Pat Johnsen og Hans Reite vart vald til å signere protokollen.
  • Årsmeldinga for 2018 vart opplest og vedteken med to merknader.
  • Rekneskapet for 2018 vart gjennomgått og godkjend.
  • Investering vedrørande nytt teppe i hallen vart røysta over og vedteke. Truleg kan nytt dekke vere ferdigmontert i slutten av mai 2019.
  • Innkomne saker/forslag: Ingen nye forslag.
  • Medlemskontigent 2019: 
    • Forslag om uendra satsar vedteke.
    • Treningskontigent for hallen og utebana 2019: Forslag om uendra satsar vedteke
  • Budsjettet for 2019 vart gjennomgått og vedteke.
  • Val av nytt styre:

 

Leiar: Vebjørn Skeide – 2 år

Nestleiar: Sverre Johnsen (spesielt ansvar for tennishallen) – 2 år

Kasserar: Helge Haram – 1 år

Skrivar: Ole Wirum – 1 år

Styremedlem: Kai Are Strande – 1 år

Styremedlem: Hallgrim Myklebust – 2 år

Varamedlem: Oddbjørn Nes – 2 år

 

Valkomite:

 

Patricia Johnsen (leiar), Odd Nesse og Egil Reite. Vara: Hans Reite.

Revisorar: Lars E. Sande og Øystein Nilsen

Utebana: Hallgrim Myklebust, Kai Are Strande og Hans Reite.

 

 

Volda Tennislag

Ole Wirum

 

 

 

Voldameisterskapen 2017

10 og 11 mars stilte 9 spelara til eit forsinka Voldameisterskap arrangert i tennishallen i Volda.

Det var god stemning flott innsats av samtlige!


 

Det va ingen feilskjær frå regjerande Voldameister Kai Are Strande. Han gikk fort opp i 4-0 i første sett. Då våkna Arne Inge (kanskje han skulle ha drukke en ekstra kopp kaffe til frokost!) og han fikk inn nåken serve games, og vi endte på 6-2. Publikum håpte på et spanades andre sett og kom med motiverandes tilrop til utfordraren, men Kai Are holdt nervane i sjakk og gjorde veldig få feil og settet endte med den sure smultringen for Arne Inge.

 

Som plaster på såret for Arne Inge så tok han tittelen i double saman med Hans Reite. Eit radarpar på teppet!

 

Fullt resultat for helga blei som følger

 

Utklipp frå Møre avisa

 

Kai Are på serve

Arne-Inge på serve

Ymse døming men bra spel!

 

 

Kai Are Strande voldameister 2016

I romjula vart voldameisterskapen i tennis arrangert i tennishallen i Volda. Nokre melde forfall grunna sjukdom, men det var åtte som stilte opp. Tennismiljøet i Volda er bra, og folk kjem frå heile distriktet for å spele. Difor er det no mest uråd å få fast time om kveldane i hallen. Tennis er ein kjekk sport som passar for folk i alle aldrar. Noreg har ikkje nokon heilt på toppnivå i verda, men Casper Ruud hevdar seg bra, i tillegg til ein junior på kvinnesida. Vi vonar at tennis vil verte endå meir populært her i landet.

Første dag var det innleiande kampar med eitt sett i kvar kamp. Det var to avdelingar og til saman 12 kampar. Fleire av kampane enda 6-0, og det vart klart kven som gikk vidare til semifinalane. Stemninga var god, og ein del folk hadde tatt vegen for å heie på sine favorittar.

Fjorårsvinnaren Einar Reite stilte ikkje opp, og Kai Are Strande frå Ørsta var klar favoritt. I første semifinalen vann han 2-0 over Hallgrim Myklebust frå Volda. I den andre vann Odd Nesse frå Ulsteinvik 2-1 over Kristian Nybakk frå Måløy.  Kristian har lenge budd i London, men bur no i Tjørvåg. I bronsefinalen vann Hallgim 2-1 over Kristian. Det var jamne og gode kampar med mykje god tennis. I finalen vann Kai Are 6-0, 6-1 over Odd. Han vart voldameister for sjuande gong og er ganske suveren. Kai Are kunne nok nådd langt også på landsbasis! Han er eit multitalent i sport. Det var også imponerande av Odd å nå finalen då han har vore mykje plaga av sjukdom.

Vi vonar at fleire unge vil begynne å spele tennis og slå ut oss eldre. Velkomen til Volda tennislag og godt nytt år!

ref.

 

Frå venstre: Hallgrim Myklebust, Kai Are Strande, Odd Nesse og Kristian Nybakk

 

SENTRALT ELEKTRONISK MEDLEMSREGISTER

Før nyttår må vi få registrert alle medlemmer i Volda Tennislag i det sentrale elektroniske medlemsregisteret.

Difor må alle medlemmer i Volda Tennislag opprette profil i minidrett.no. Dei som har profil frå før treng ikkje opprette ny.

Gå deretter inn på Medlemskap, søk opp Volda Tennislag og send søknad om medlemskap.

Søknaden blir så behandla av Helge Haram eller Oddbjørn Nes (medlemsansvarlege i Volda Tennislag) og det vil kome ei stadfesting på medlemsskapet pr. e-post.

Dei som har familiemedlemskap må registrere dei andre familiemedlemmene på sin profil på Legg til familie.

Ved problem med dette, kontakt support-telefon 03615, Helge Haram (915 69 660) eller Oddbjørn Nes (905 65 950)

 

Einar Reite voldameister 2015

19. - 20. desember vart voldameisterskapen i tennis arrangert i tennishallen i Volda. Interessa for tennis har teke seg opp, og det er stort sett fullt med faste timar i hallen om kveldane. Ein kan spele tennis for ein rimeleg penge her på landsbygda.
Dei siste åra har Kai Are Strande frå Ørsta vore den dominerande spelaren. Han har vorte voldameister heile seks gonger. Vi var spente på korleis det ville gå i år. Spelarane vart delt i to grupper for dei innleiande kampane. Veteranen Hans Reite heldt på å gå vidare, men etter å ha leia 5-0 vart det kollaps, og han tapte på tiebreak mot Odd Nesse frå Ulsteinvik. Nesse har tidlegare spela divisjonstennis i Bergen og har flott teknikk.
I første semifinale vann Einar Reite 6-2, 6-3 over Hallgrim Myklebust. I den andre vann Kai Are Strande 6-1,6-1 over Odd Nesse. I bronsefinala vann Hallgrim 6-2,6-2 over Odd. No var alle spente på finala. Ein del familie og vennar av spelarane var til stades. Det vart spanande, men til slutt vann Einar 6-4, 7-6 ( 9-7) over Kai Are. Einar vart voldameister for tredje gong. Tennistrona var tilbake i Volda! Det er framleis prestisje og konkurranse mellom desse to bygdene.
Hallgrim Myklebust uttalte etter kampen at dette var den beste finalen han hadde sett i Volda. Også Odd Nesse var imponert. Det var tennis på høgt nivå med fart og stor presisjon. Tennis er ein artig, men svært krevjande idrett. Så blir spørsmålet til neste år: Vil Ørsta kjempe seg tilbake eller skal voldameisteren vere frå Volda?
ref.

 


 

Reservasjon av time

For å reservere timar må ein logge på med namn og passord, og ein må vere medlem i Volda Tennislag. For å verte medlem eller for prøvetime: Kontakt Helge Haram, tlf. 915 69 660, eller e-post Denne e-postadressa er verna mot program som samlar e-postadresser. Du må aktivere JavaScript for å kunne sjå adressa .

 
Spelekompis
Latest Message: 4 months, 3 weeks ago
  • Ingunn Egset : Hei! Nokon som vil spele tennis med meg? Er her heile neste veke
  • Ingunn Egset : Hei! Nokon som vil spele med meg? Er her i helga og heile neste veke
  • Ingunn Egset : Heia, finnes det nokon som vil spele med meg? Eg er fri når som helst ! .+
  • Hallgrim Myk : Husk at turneringa i morgon er på utebana!
  • Hallgrim Myk : Voldatennislag.no/joomla prøv denne lenka for bestilling på utebana
  • Hallgrim Myk : Voldatennislag.no/joomla
  • Hallgrim Myk : Bruk sko som er reine og ikkje set merker i hallen. Ikkje bruk uteballar i hallen.
  • Hallgrim Myk : Sjå Facebook, volda tennislag, for oppsett VM i tennis 26. Og 27.1
  • Hallgrim Myk : Siste frist for påmelding vm i tennis er no onsdag 23.1. Turnering starter 26.1. Nb! Avgift er 50 for medlem og 100 for resten.
  • Hallgrim Myk : Vm i tennis blir utsett. Nytt tidspunkt kjem seinare.

Only registered users are allowed to post

Nyhende